خواطر على بالى

خواطر على بالى ,,
مصر ,,
يامصر يا صابرة على الزمن واللى أتجوزوكى
لو كان يعرفو قيمة عظمتك لأنحنوا وأحترموكى
ألأصول يسألوا , أصلك وفصلك وبعدين يخيروكى
أشرفلك تطلقى م اللى ما قدرك وترجعى بيت أبوكى ,,
عجبى
*****************
حمال الهموم ,,
يا شايل هموم الناس والزمن مين يشيل همك
عايش دنيتك فى حب الناس ولا شىء همك
الظهر تتغدى ومن غير عشا تنام ولا همك
تعيش تدافع عن حياة الناس وتموت مع همك ,,
عجبى
*****************
بنت ناس ,,
عجبى على بنت ناس أصيلة باعوها لخسيس
من اول بداية الطريق أنكشف و بان الخسيس
من بعد عزة نفس ادب وكرامه يوطيها الخسيس
ياقلبى صبرك على اللى طبعه واطى وخسيس
بكرة يتبدل وتفضل هى أصيله ويموت هو خسيس ,,
عجبى
*****************
حشاش ,,
يا عم يا اللى صارف فلوسك على الحشيش ليلاتى
وتقول أصل كيف المزاج بينده علي اللى زى حلاتى
ازاى مراتك والعيال بيناموا فى الهموم دى يوماتى
لو كان كيف المزاج بيفيد كان خلى ألأعمى ساعاتى ,,
عجبى
*****************
تعاليى ,,
أيه يفيدك يا مغرور لما على الناس تتعالى
وكل واحد يدعوك تجيله تقوله لا أنت تعالى
النهار ده كله ليك وبكرة الناس عليك تتعالى
لو عارف إن الزمن غدار ما كنت يوم تتعالى ,,
عجبى
**************
مصري ,,
يا مصرى يا شارب الهم و الغم و بايت ليلاتى فييه
نفسى ف يوم دنيته تفرج ويفرح ويبتسم والخير يجيه
كريم بشوش بسام وسنه بيضحك و قلبه الحزن ماليه
سنين عايش صابر على المر , أتكلم ساكت ليه عليه